عيش
لو عايز تعيش
واللا انت عايز تاكل عيش؟
وتعيش تسترزق مِنَّها
وتعيش وتفرح من همَّها
واهو كله كله ب اسم القضية
ليل نهار ثوار أحرار
نطهر جروحنا بويسكى الخمورجية
ونعيش حرية
حرية
يعنى تعمل ما بدالك
سيب مراتك سيب عيالك
وتعالى نقعد سوا ع النت
تعالى فيسى تلقانى وأساحبى سوا بنفت
مقضينها ضحك وتريقة ع الكل
واحد فلافل
واحد بدقن
واحد بصوبع
أهو كله ماشى .. صبح صباحه .. ومساها فل
محناش بنعتق حد فى البارتيتة
كله لازم يبقى نكتة ومدونة وتويتة
وهى دى العدالة الفيسبوكية
قصدى العدالة الاجتماعية
نبقى كلنا سواسية
كله يسقط .. كله يسقط
النظام والعسكر .. والمرشد الأكبر
وأى حاجة لسه جايَّه .. برضه تسقط
كله يسقط
حتى هىَّ راخره تسقط
عارف يا صاحبى
لما شفتها مقتوله .. ومسحوله
وفرحانه وشمتانه وندمانه
وعامله نفسها زعلانه
عارف يا صاحبى
لما لقيتها مكلضمه
ومستحرمه اللى حاصل
ومزغردة ..
ومزقططة بكل اللى حاصل
أنا قلت مالها؟
سكرانة دىَّ م الدم اللى سايل؟
واللا انا اللى عبيط؟
باينَّ انا اللى عبيط
وأخرى أطلع زهقى ف قصيدة
وانت كمان يا صاحبى عبيط
وأخرك تطلَّع زهقك برضه ف قصيدة
أو فى ستاتس
أو فى مقالة
أو فى جرافيتى جديد ع الحيط
يا عبيط
يا عبيط
