في ناس تقول لك الحياة اتخلقت علشان نعيشها مش علشان نقعد نفكر ازاى نعيشها
ناس تقول لك إيه الفايدة انك تعيش حياة مالهاش معنى ، عيش دقيقة ليها معنى أحسن من سنين ضايعة ع الفاضي
ناس تقول لك المشاعر ضعف ، بطَّل تحزن قوي وتفرح قوى وتحب قوي وتكره قوى علشان متتبهدلش بالقوي
وناس تقول لأ طبعاً هو الحياة يبقى ليها طعم من غير مشاعر ، الحياة اللى من غير مشاعر تبقى روتين ممل ، جفاف
ناس تقول لك الحياة شقى وتعب وناس تقول لك السعادة قرار
ناس فلحوسة بقى تقول لك الحياة من ده وده
الحياة توازن بين كفتين ، لو ميلت على يمة فيهم قوى .. ح تخسر ميزتها و حتدوق مشاكلها
أنا من الناس الفلحوسة دى
جاى من اليمة اللى بتفكر كتير إزاى يعيش حياته ، وزهقت انى ب افكر ومش عايش ، وب أحاول كل فترة إنى أعيش
لكن مش طبيعتى إنى أروح الملاهى أركب الأفعوانية واللا اروح باونس وافضل اتنطط ع النطيطة بس ب أحاول
وجاى م اليمة اللى بتضعف قصاد مشاعرها جداً ، وزهقت من كتر ما ب احط احتياجات الناس اللى حواليا قبل احتياجاتى
لكن مش طبيعتى إنى الاقى حد محتاج كتف يعيط عليه أو عكاز يتسند بيه وأقول وانا مالى بس لا مانع
جاى من اليمة اللى مؤمنة بإن الحياة نصب وتعب على الدوام لكن زهقت من جو المفعول به دوة وب أحاول ابقى سيد حياتى
لكن الطبع ساعات كتير بيغلب التطبع ، وده طبيعى ، ما حدش بيتعلم ركوب العجل من أول مرة
أدينى ب أحاول
وح افضل أحاول
مش عايز أوصل لآخر اليمة التانية ، مش عايز ابقى شخص تانى غيرى
لكن عايز أوازن نقاط الضعف فيا علشان أقدر أكمل المشوار
Finding A Happy Medium
No comments:
Post a Comment