من حبة فتحت درج المكتب
لقيت فيه ماضي ندمان شقيان مترَّب
حزين على الحاجات اللى متعملتش
واللى اتعملت وطلعت مقلب
وعلى القيم والمُثُل
واللى انكتب من هبل ما منوش مهرب
وعلى السذاجة
وعلى السذاجة اللى لافت عليه
ولفِّت بيه .. ضيعته وما ضاعتش
...........................
مدِّيت إيدى في جيب الجاكتة اليمين
عِتِرت على شوية أحلام مكسورين
لأ .. ما كانوش مكسورين
دول منسيين من سنين
مغسولين
بايشين
مش باين من ملامحهم غير ورقة وقلم
ويمكن قلب
ويمكن درب مش باين مودِّى لفين
لكن شايفه ابتدانى فين
ومنين
وليه مَكْمِلش
منها لله السذاجة
منها لله السذاجة اللى لافت عليه
ولفت بيه .. ضيعته وما ضاعتش.
No comments:
Post a Comment