الموت

حاجات كتيرة فى الدنيا دى بيتغير معناها بالنسبة للواحد بمرور الزمن
بتبقى هيَّا هيَّا نفس الحاجة ... نفس الكلمة .. لكن كل فترة بيبقى ليها معنى مختلف
مثلاً : المدرسة
واحنا صغيرين قوى - قبل م ندخلها - ممكن تبقى حلم .. وممكن تبقى رعب ، وبعد م ندخلها بشوية .. ممكن تبقى متعة .. وممكن تبقى مجرد عادة
ولما بنكبر أكتر .. ممكن تبقى كل دنيتنا .. وممكن تبقى مجرد بوابة للدنيا ، وامَّا بتخلص بتبقى ذكرى .. سواء ذكرى بنحب نفتكرها .. أو بننساها من غير تعب
ونكبر أكتر وتبقى المدرسة ليها معنى مختلف عن كل ده ، فترة .. من غير مسئوليات ; فترة همومها صغيرة وأفراحها جديدة ; وناسها وأحداثها بيسيبوا أثر فى صفحة النفس والعقل ، حتى لو الذكرى نفسها اتنست ملامحها .. لكن الأثر .. بيفضل .. بيعلِّم .. بيغيَّر .. بيشكِّل ملامحنا ونكبر أكتر وأكتر والمدرسة هيَّا هيَّا .. لكن نظرتنا ليها هى اللى بتتغيَّر ، وكل ما نكبر وكل ما بنحس إن العمر بيعدى .. كل ما نظرتنا للأمور بتختلف
المهم .. ما بيفضلش مهم
واللى كان مستعجل بيبقى ماضى
والتافه بنحس بدوره
والذكريات السيئة بتاخد معنى جديد
والزمن بيبان على حقيقته
الزمن .. مخلوق علشان يخلص
زمان قريت جملة وكنت ب احبها .. واحب أصبَّر نفسى بيها .. كانت بتقول :
"من المسئول عن كل هذه الذكريات الجميلة؟
                         إنها الذاكرة السيئة"
أعتقد إن الإجابة دى محتاجة تتغير
المسئول عن الذكريات الجميلة هو الزمن
الزمن .. لما بيبان على حقيقته