محتاج تدريب

2011

كانت سنة فُلَّه ...
على الرغم من إنها على المستوى الشخصى كان فيها بعض المميزات المهمة فى حياتى ; إلا إنها على المستوى العام - وبالذات مصر طبعا - كانت سنة مش ولابد

ولأنى مكنتش من مؤيدى الثورة .. بالعنف اللى هى فيه ، ولأن أواخر السنة كانت أحداث ماسبيرو عاملة لى حالة غريبة من الحيرة والتساؤل ... هى المحبة راحت فين؟!

وكان الشعور اللى عندى إنها ماتت من زمان ، وكنا بنضحك على بعض , ومنيمنها على جهاز تنفس صناعى علشان نفضل مقتنعين إن لسه فيه محبة.
أياميها كانت النصيحة ... إبدأ بنفسك
عايز ربنا يمد إيده ، ويلمس المحبة فى نعشها .. ابتدى إنت وحب
قدم المحبة

2012

ابتديتها بتدريب على المحبة
المحبة فعل إرادة ..
وكمسيحى .. المحبة هى الله
وبالتالى الحياة مع الله هى السلوك بمحبة ، وبالرغم إن التدريب لسه م انتهاش ، والمحبة لسه بتعانى معايا ، ولسه م أثمرتش جوايا ثمار تتاكل  وتتشاف ، لكن على الأقل البذرة بقت موجودة .. وعارف إنها - بمحبة ربنا وعنايته ليها - ح تكبر فى يوم من الأيام
المشكلة .. إنى محتاج حاجات كتير قوى علشان أحافظ على البذرة دى..
آخر كام يوم .. حاسس إن الرجاء من أهم الأمور اللى أنا محتاجها للحفاظ على نفسى فى طريق المحبة
المشكلة إن أنا طول عمرى عارف إنى - فى تصنيف أرسطو للشخصيات - أنا شخصية باحثة عن الكمال
والشخصية دى دايماً نمكية .. بتدقق قوى فى التفاصيل ، ومن عيوبها اللى موجودة بشدة فيَّا .. التشاؤم
"شخص متشائم وعايز يبقى عنده رجاء"

2013

أظن إنى محتاج تدريب على التفكير الإيجابى