Too late يا والدى

اليأس ممكن يخلى الواحد يموت وهو عايش.

أنا عامل البلوج دى من ييجى تلات سنين وكنت عامل خطة إنى أكتب فيها يوميا

.أو أسبوعياً

.وكالعادة , الكتابة عندى مزاجاتليه

.تقب شوية .... وبعدين تغطس

.لا عارف بتقب ازاى ولا عارف بتغطس ليه ولا بتروح فين

.المشكلة بتتكرر معايا من أول م ابتديت اكتب فى تانية ثانوى

.بس زمان كنت ب اكتب أغانى وشعر عامية وكده ... وكنت ب اتحجج بالإلهام

لكن لما ابتديت اكتب قصص ومحاولات لروايات .. الامر م اختلفش ، بس الحجة بطلت

.الأفكار موجودة .. وساعات بتبقى مرطرطة ، بس ما فيش وقت

تيجى الأجازة أو يفضالى يوم واللا اتنين الصبحية .. تلاقيهم يضيعوا فى الصحيان متأخر واللا الفيس .واللا الشطرنج

كل اللى بينصحوا الناس اللى عايزين يبقوا كتاب متفقين على النصيحة دى ، لازم تتمرن على الكتابة ، لازم الكتابة تبقى روتين فى حياتك ، لازم تراقب نفسك وتحط جدول وتجبر نفسك على الالتزام بالجدول

مش عارف ، حقيقى مش عارف

.أنا ابتديت أيأس من نفسى بجد

.عموماً دى محاولة جديدة من محاولاتى إن ألتزم بالكتابة اليومية

.أو شبه اليومية علشان اكون واقعى

آخر محاولة ليا للكتابة شبه اليومية كانت مع رواية 27 ، مشيت كام يوم حلوين لكن عطلت فترة والأفكار (بتاعة التفاصيل ) شحت فترة لحد ما وقفت

ح احاول المرة دى إنى أتجنب المشكلة دى بإنى أكتب فى البلوجر حاجات متفرقة مش مرتبطة ببعض، علشان لو وقفت يوم واللا أسبوع ، أقدر ارجع تانى بسهولة ، وحتة الأفكار ح احاول اتغلب عليها بإنى أستعين بصور معبرة ، تفتح عندى باب لأفكار بسيطة للكتابة، مجرد مقالات أو نوع من التأملات فى الصور

وح استغل أى وقت فاضى فى الشغل علشان أعمل بحث على صور جديدة كل فترة ، وأخزنها بحيث

دايماً يبقى فيه أفكار جاهزة للكتابة

.القصة كلها مجرد تمرين ، والتزام

لا مانع طبعاً إنكوا تقروا وتقولوا رأيكم  بس ده مش الأساس دلوقتى ، علشان كده ح استخدم البلوجر مش الفيس

مش عايز انشغل فى انتقادات أو مناقشات أو حتى لايكات ، ولا عايز أتشتت ببقية الحياة الاحتياطية اللى على الفيس

عايز أركز وابتدى 

على بركة الله

#Who_am_I?