حد فاكر اصحابه من حضانة أو بداية الابتدائى؟
فاكر كنت مصاحب مين؟ نادراً ما تلاقى حد منهم مكمل معاك لفترة طويلة
ولما تكبر شويتين تلاتة كده ، غالباً ح تكتشف قد إيه الفروقات ما بينك وبين اصحاب المرحلة دى كبييييييرة جداً
لو سألت نفسك ، هو احنا كنا اصحاب ازاى؟ يمكن ما تلاقيش إجابات ، أصل الاطفال فى السن ده ما بيكونش عندهم أسباب ، معندهمش منطق من بتاع الكبار
ممكن يتصاحبوا علشان هم الاتنين قصيرين ف المس قعدتهم جمب بعض فى اول صف علشان يشوفوا السبورة
أو ممكن يتصاحبوا فى الحوش علشان واحد فيهم زق التانى فوقع وقعد يعيط ، وهو خاف ليقول للمس فقعد يواسيه ويلعب معاه
أو علشان طلعوا حافظين نفس أغنية الأطفال اللى المس طلبتها ، فوقفوا يغنوها سوا ، وفضلوا يغنوها سوا
أى صدفة وخلاص بتجمعهم ... بيقدروا منها يبتدوا بسلاسة وسهولة انهم يكملوا المشوار ، لكن شوية شوية منطق الكبار بيغلبهم
ده رخم ... ده مالوش فى الكورة ، ده مش شاطر ، ده فقير ، ده غبى ، ده تنك
والعقل يشتغل ... ويفرق
يا ترى فعلاً الفطرة بتاعة الاطفال هى الاصدق واللا المنطق بتاع الكبار؟
ياترى فعلاً واحنا صغيرين بنكون عُمْى واللا بتكون بصيرتنا أحد من منطق الكبار؟
هل الناس فعلاً سواسية وكلهم ينفعوا يبقوا اصحابنا زى ما كنا أطفال؟
واللا الناس مقامات ... ولكل مقام مقال؟
#Who_am_I?
No comments:
Post a Comment