مكتبة برفوف

اللى يعرفونى من قريب .. يعرفوا انى ب احب القراية ، وان عندى حب شديد للكتب

فى منهم ناس بيقولوا انى دودة كتب ، بس الحقيقة أنا مش دودة ولا حاجة ، هم اللى ما بيحبوش القراية

أنا فى حياتى كلها ممكن يكون اللى اتعاملت معاهم وعرفت عنهم حب الكتب عدد يتعد على الصوابع ، وأغلبهم كانوا شلتى

واحد بس من شلتى ، هو اللى ممكن اعتبره دودة قراية ، كان بيقرا أى حاجة تقع تحت إيده وفى أى مجال ، أغلبنا كنا بنقرا دينى

أنا ممكن أضيف شوية تاريخ على روايات ودواوين شعر ، لكن هو علمنى أقرا أى حاجة

سياسة ، علم الأحجار ، سلاسل عالم المعرفة

طبعاً شخص قليل المعارف زى حالاتى ماهواش مقياس لعدد الناس اللى بتحب القراية

لكن على الفيس قابلت ناس كتير بتقرا ، أو بتقول انها بتقرا

وعلى الجودريد شفت ناس كتيير عاملين نادى كتاب وبيقروا سوا كتاب كل أسبوع 

كل أسبوع!!!!

الناس دى بتقرا مينيمم 50 كتاب فى السنة ، وفيه ستين وفيه سبعين ، وفيه ناس بتعمل تحدى قراية المية كتاب فى السنة

معرفش العالم دى فاضية ما بتشتغلش واللا إيه ظروفها ، بس انا ممكن اعملى عشرين تلاتين بالكتير .فى السنة ، وممكن يبقى فيهم كام  كتاب كده صغننين علشان ننجزهم فى السريع ونرفع الرقم

اللى عقدتنى بقى

دينا نبيل ، صاحبة مدونة رفايع

الأخت دى بتقرا مجلدات قصة الحضارة بالترتيب

زائد عشرة اتناشر كتاب تانيين جمبيهم كل شهر

انا متابعها وهى طالبة فى طب ، وما أدراك ما طب ، وحاليا دكتورة امتياز وبتشتغل حكومة وتلات عيادات خاص وبرضه ممكملة قراية بنفس المعدل

يا جماعة أنا مبقراش

لو جينا للعدد أنا مبقراش

وحتى الكيف ، أنا صحيح اتعلمت أنوَّع قراياتى ، دخلت السياسة والتنمية البشرية وعلوم الإدارة وطبعاً الفلسفة وعلم النفس

لكن اللى ب اعتبره انجازى الجديد هو انى اتعلمت أقرا بالإنجليزى

صديق العمر عرفنى ع الكيندل ، والكيندل أجبرنى ع الانجليزى

صدق اللى قال ، إذا كنت بتقرا بلغة واحدة فانت مبتقراش  ، إذا كنت بتقرا بلغتين فانت يدوبك بتبدى تقرا

أنا يدوبك ابتديت أقرا

وفى الانجليزى ، لسه بتهته ، بس ماشى شغال

لكن محدش يقول عليا دودة قراية ... ب احب القراية ماشى

لكن دودة .. لأ

ده أنا حتى معنديش مكتبة برفوف ، كله بى دى إف وكندل

 #Who_am_I?