زمان من 15 - 20 سنة لما كنت ب اقول للناس أنا عند إدمان للشاى ، أو انا ناوى الصيام ده أجاهد ضد شهوة الشاى
كانوا بيضحكوا ويقولوا : واو سو كيوت
وكأن انا ب اتفشخر بزهدى أو خلاص مش لاقى حاجة أتغصب فيها ف باخترع موضوع الشاى
بس انا فعلاً عندى مشكلة حقيقية مع الشاى
فاكر أول مرة لاحظت المشكلة دى كنت فى ثانوية عامة
كان فى يومين فى الأسبوع عندى فيهم دروس بدرى قبل المدرسة ، فكنت ب انزل من غير م افطر أو اشرب كوباية الشاى بتاعة الصبح
الفطار مقدور عليه ، الست الوالدة كانت بتحشرالسندوتشات فى الشنطة ، لكن الشاى ح تعمل فيه إيه؟
اليومين دول كان لازم يجينى صداع شديد على الضهرية
فى الأول مكنتش ب انتبه ، لحد ما ربطت بين عدم شرب الشاى والصداع
يوميها قررت إنى أجاهد ضد الشاى
وفعلاً نجحت
لكن على طريقة تبطيل السجاير ونكتتها الشهيرة :"تبطيل السجاير ده سهل جداً ، أنا مبطلها لغاية دلوقتى عشر مرات"
فى فترة من الفترات كنت ب اقنع نفسى إنى خلاص ، كسبت المعركة ضد الشاى ، أنا بطلته حوالى 3 سنين ، ومعدش فيه الرابطة بتاعة الصداع دى ، يعنى خلاص ممكن أشربه طالما إنه مش إدمان
طالما إنى لو فوته يوم مش ح يأثر عليا
لكن الحقيقة إنى لسه مرتبط بالشاى ، يمكن مش فسيولوجياً لكن سيكولوجياً
يعنى أنا خلصت من الأعراض الإدمانية اللى بتظهر بسبب نقص الجرعة ، لكنى لسه مرتبط بيه نفسياً ، لسه ب اعتمد عليه علشان يحقق لى حالة الرضا والانسجام اللى ب اشعر بيهم وانا ماسك الكوباية وب
اشفط فيها شفطة ورا شفطة
مافيش مشروب تانى بيدينى الإحساس ده
حتى لما ابتديت اتعب من الكافيين ، كان سهل جداً إنى أبطل القهوة لكن الشاى مش ممكن
مع إنى أقدر اجيب قهوة بدون كافيين ، لكن أنا عايز شاى
بطلت المغلى ، وب اشرب فتلة
بطلت اسيب الفتلة جوه الكوباية وبقيت اشيلها على طول
بطلت حتى أشرب الكوباية لآخر شفطة ... بس لازم أشرب شاى
مش كل يوم .. لكن كل م احب اتمزج واستكنيس ... يبقى لازم واحد شاى وصلحه
#Who_am_I?
No comments:
Post a Comment